猪猪宠物联盟

炎炎日最适合当然系去海边同阳光玩游戏啦^^今次就plan左同bf去长洲

出发前一日，香港竟然挂8号风球！唔系挂，我哋已经俾晒酒店钱，bf又专登请左假，“唔通连个天都唔中意我”？

不过好彩台风来得快、去得又快，出发当日虽然无阳光，但总算除晒风球

废话少讲，我哋开始向长洲出发 (路线：罗湖－尖沙咀东－天星渡轮过中环码头－长洲)

中环5号码头往长洲，快速船35分钟，一日n班船，盛惠HK$22

经过35分钟好似海盗船咁刺激船程，我哋终于来到长洲啦。

东湾沙滩好干净，水清沙幼，可能因为时间尚早，係度戏水既游人并唔多，係沙滩既尽头，就系我哋今次要入住既酒店“长洲华威酒店”

係行去酒店既途中见到好靓、好得意既墙画

酒店入口

我哋间房，向海既弧形玻璃阳台景色好靓，即使关门训觉都可以听到阵阵海浪声！！

係阳台影既沙滩景，海入面弧形既系防鲨网，係呢个范围内游水就唔洗惊有鲨鱼啦！

酒店既烧烤场，住客免费使用

长洲出名多小食、海鲜平，今次出发前我专登做定功课，准备左个美食地图，係酒店放低D野，我哋就出动去医肚喇

第一站：东湾路16号“啤洲工房”，必食品“巨薯棒”，每支60cm长既薯棒都系由一只薯仔旋转型不间断咁切出来，个样好玩又好味，盛惠HK$17

係“啤洲工房”隔离既系刘平记小食，有大大粒鱼旦同好多中式糕点卖。鱼旦好大粒，有普通鱼旦1粒半咁大，但好淋，唔弹牙，感觉嘛嘛地。係呢附近仲有一个日本太太经营既红豆饼同寿司卖，口碑好好，价廉物美，不过我对红豆同寿司都无兴趣，无食到。

第二站：新兴街3号“允升甜品”，呢间甜品以芒果甜品出名，全部用澳洲芒果制成，我哋去到时事头婆仲係度切紧当日要用既芒果

芒果糯米糍：好大粒，皮薄馅靓，入面系一大旧芒果肉，好香！

双色肠粉+芒果汁：白色既系椰汁皮包芒果肉，绿色既系海带皮包芒果肉。两种皮都好嫩滑，凉凉哋加埋大大旧芒果肉，同埋完全无加水既芒果汁，真系好好好好好好味啊！！！！完全赢晒“许*山”所有芒果甜品N条街

第三站：新兴街106号“甘永泰鱼旦”，长洲既老字号，白色鱼旦，皮脆，肉质弹牙，有鱼既香味但唔腥，我同BF一致认为世界上最好食鱼旦，HK$5一串，HK$48一斤

医饱个肚，阳光都终于出来，可以去游水喇

係海面度见到既滑浪风帆，唔知道长洲几时会再孕育多一个风帆奥运冠军呢？

玩完水，我哋就出咗西堤食饭，西堤既日落充满渔村特色

康记餐厅的海鲜套餐：姜葱炒蟹+白灼虾+豉椒炒蚬+虾酱通菜+啤酒&饭＝HK$208

食饱饱后同BF係周围行下街、行下沙滩，番酒店睇电视，到左夜晚11点，码头夜市开市，我哋呢两个为食鬼有出来扫街喇

夜市全部都系推车仔出来卖：有寿司、串烧、煎酿3宝、钵仔膏、碗仔翅、生菜鱼肉、粥粉面，我同BF就买左串烧+煎酿3宝+生菜鱼肉拎番酒店，坐係阳台，对住个海，边食边望星^_^

第二日训醒，下午1点check out，同BF饮完茶，买左我哋至爱既鱼旦，坐慢船离开长洲。

慢船分普通位(HK$11.5)同豪华位(HK$18.5)，豪华位可以食野、睇电视、开台打牌，仲可以行出船舱吹下海风，好舒服。